நோக்கங்கள்:

நோக்கம்1: அம்பர் கோட்டை எங்குள்ளது என்பதை அறிதல்.

நோக்கம்2: அம்பர் கோட்டையின் வரலாற்று முக்கியத்துவத்தைப் புரிந்து கொள்க.

நோக்கம்3: கோட்டையின் கட்டிடக்கலை அம்சங்களைப் பற்றி அறிதல்.

நோக்கம்4: அம்பர் கோட்டையின் பாரம்பரிய முக்கியத்துவத்தைப் பற்றி அறிதல்.

நோக்கம்1: அம்பர் கோட்டை எங்குள்ளது என்பதை அறிதல்

அம்பர் கோட்டை (Amber Fort) ஜெய்கர் (Jaigarh) கோட்டைக்குக் கீழே ஆரவல்லி மலைத்தொடர்களின் பள்ளத்தாக்கில் அமைந்துள்ளது. தலைநகரை ஜெய்ப்பூருக்கு மாற்றுவதற்கு முன்பு, அம்பர், கச்வாஹா ராஜபுத்திரர்களின் தலைநகராக இருந்தது. அமர் கோட்டை அல்லது அம்பர் கோட்டை என்பது இந்தியாவின் ராஜஸ்தானின் அமரில் அமைந்துள்ள ஒரு கோட்டையாகும். ராஜஸ்தானின் தலைநகரான ஜெய்ப்பூரிலிருந்து 11 கிலோமீட்டர் (6.8 மைல்) தொலைவில் அமைந்துள்ள 4 சதுர கிலோமீட்டர் (1.5 சதுர மைல்) பரப்பளவைக் கொண்ட ஒரு நகரம் அமர் ஆகும். ஒரு மலையின் உச்சியில் அமைந்துள்ள இது ஜெய்ப்பூரின் முக்கிய சுற்றுலா தலமாகும்.

நோக்கம்2: அம்பர் கோட்டையின் வரலாற்று முக்கியத்துவத்தைப் புரிந்து கொள்க.

அம்பர், ஆரம்பத்தில் சுசாவத் மீனா பழங்குடியினரின் (Susawat Meena tribe) கட்டுப்பாட்டில் இருந்தது. 11 ஆம் நூற்றாண்டில், சோததேவாவின் மகன் துலாஹ்ராய் (Dulahrai) (தோலா), துந்தர் பகுதியில் கச்வாஹா வம்சத்திற்கு (Kachhwaha dynasty) அடித்தளம் அமைத்தார். அவரது மகன் காகில் தேவ், பழங்குடியினர் மீனாக்களிடமிருந்து அம்பரின் ஆட்சியைக் கைப்பற்றினார்.

16 ஆம் நூற்றாண்டின் இறுதியில் ராஜா மான் சிங் I புதிய அரண்மனை வளாகத்தின் கட்டுமானத்தைத் தொடங்கினார். ராஜா மான் சிங் I க்குப் பிறகு, மிர்சா ராஜா ஜெய் சிங் I மற்றும் சவாய் ஜெய் சிங் II ஆகியோர் அவ்வப்போது தேவைகளுக்கு ஏற்ப மாற்றங்களை செய்தனர். அவர்கள் தங்கள் சொந்த நலன்களுக்கு ஏற்ப உட்புற அலங்காரத்தையும் மாற்றினர். முழு கோட்டையும் நான்கு நிலைகளில் கட்டப்பட்டது.

அம்பர் கோட்டை அதன் கட்டிட கலை பாணி கூறுகளுக்கு பெயர் பெற்றது. அதன் பெரிய அரண்கள், தொடர் வாயில்கள் மற்றும் கற்கள் பதிக்கப்பட்ட பாதைகளுடன், கோட்டை மாவோட்டா ஏரியை நோக்கி செல்கிறது. இது அமர் அரண்மனைக்கு முக்கிய நீர் ஆதாரமாகும்.

நோக்கம்3: கோட்டையின் கட்டிடக்கலை அம்சங்களைப் பற்றி அறிதல்

அமீர் அரண்மனை ராஜபுட் கட்டிடக்கலைக்கு ஒரு சிறந்த எடுத்துக்காட்டு. அதன் சில கட்டிடங்கள் மற்றும் வேலைப்பாடுகள் முகலாய கட்டிடக்கலையின் தாக்கத்தைக் கொண்டுள்ளன. சிவப்பு மணற்கல் மற்றும் பளிங்குக் கற்களால் கட்டப்பட்ட இந்த கவர்ச்சிகரமான, செழிப்பான அரண்மனை நான்கு நிலைகளில், ஒவ்வொன்றும் ஒரு முற்றத்துடன் அமைக்கப்பட்டுள்ளது. இது திவான்-இ-ஆம், அல்லது “பொது பார்வையாளர்களின் மண்டபம்”; திவான்-இ-காஸ், அல்லது “தனிய பார்வையாளர்களின் மண்டபம்”; ஷீஷ் மஹால் (கண்ணாடி அரண்மனை), அல்லது ஜெய் மந்திர்; மற்றும் அரண்மனைக்குள் ஒரு நீர்வீழ்ச்சியின் மீது வீசும் காற்றினால் செயற்கையாக குளிர்ந்த கால நிலை உருவாக்கப்படும் சுக் நிவாஸ் ஆகியவற்றைக் கொண்டுள்ளது. எனவே, அமீர் கோட்டை அமீர் அரண்மனை என்றும் பிரபலமாக அழைக்கப்படுகிறது. இந்த அரண்மனை ராஜபுத்திர மகாராஜாக்கள் மற்றும் அவர்களது குடும்பத்தினரின் வசிப்பிடமாக இருந்தது.

கோட்டையின் கணேஷ் வாயிலுக்கு அருகிலுள்ள அரண்மனையின் நுழைவாயிலில், சைதன்ய வழிபாட்டின் ஒரு விக்கிரஹமான ஷிலா தேவிக்கு அர்ப்பணிக்கப்பட்ட ஒரு கோயில் உள்ளது, இது 1604 இல் வங்காளத்தின் ஜெசோர் ராஜாவைத் தோற்கடித்தபோது ராஜா மான் சிங்கிற்கு வழங்கப்பட்டது. (ஜெசோர் இப்போது வங்காளதேசத்தில் உள்ளது).

ராஜா மான் சிங்கிற்கு 12 ராணிகள் இருந்தனர், எனவே அவர் ஒவ்வொரு ராணிக்கும் ஒன்று என 12 அறைகளை உருவாக்கினார். ஒவ்வொரு அறையிலும் ராஜாவின் அறையுடன் இணைக்கப்பட்ட படிக்கட்டு இருந்தது, ஆனால் ராணிகள் மேலே செல்லக்கூடாது. ராஜா ஜெய் சிங்கிற்கு ஒரே ஒரு ராணி மட்டுமே இருந்தார், எனவே அவர் மூன்று பழைய ராணிகளின் அறைகளுக்கு சமமான ஒரு அறையைக் கட்டினார்.

இந்த அரண்மனை, ஜெய்கர் கோட்டையுடன் சேர்ந்து, அதே ஆரவல்லி மலைத்தொடரின் சீல் கா டீலா (கழுகுகளின் மலை) மீது மேலே அமைந்துள்ளது. அரண்மனை மற்றும் ஜெய்கர் கோட்டை இரண்டும் ஒரு நிலத்தடி பாதையால் இணைக்கப்பட்டுள்ளதால், ஒரு வளாகமாகக் கருதப்படுகிறது. போர்க் காலங்களில் அரச குடும்ப உறுப்பினர்களும் அமர் கோட்டையில் உள்ள மற்றவர்களும் ஜெய்கர் கோட்டைக்கு மாறுவதற்கு இந்தப் பாதை ஒரு தப்பிக்கும் பாதையாகக் கருதப்பட்டது.

நோக்கம்4: அம்பர் கோட்டையின் பாரம்பரிய முக்கியத்துவத்தைப் பற்றி அறிதல்

2013 ஆம் ஆண்டு கம்போடியாவின் புனோம் பென்னில் (Phnom Penh, Cambodia) நடைபெற்ற உலக பாரம்பரியக் குழுவின் 37வது அமர்வில், ராஜஸ்தானின் மற்ற ஐந்து கோட்டைகளுடன் சேர்ந்து, அமர் கோட்டை, ராஜஸ்தானின் மலைக்கோட்டைகள் குழுவின் ஒரு பகுதியாக யுனெஸ்கோவின் உலக பாரம்பரிய தளமாக அறிவிக்கப்பட்டது.